କର୍ଣ୍ଣାଟକରେ ଭୟଙ୍କର ସଡ଼କ ଦୁର୍ଘଟଣା। ଦୁର୍ଘଟଣାରେ ୧୫ ତୀର୍ଥଯାତ୍ରୀଙ୍କ ମୃତ୍ୟୁ ହୋଇଥିବା ସୂଚନା। ସାଭାଦ୍ଦାତି ୟାଲାମ୍ମା ମନ୍ଦିରରୁ ଦର୍ଶନ କରି ଫେରୁଥିବା ବେଳେ ଦୁର୍ଘଟଣା ଘଟିଥିବା ସୂଚନା ମିଳିଛି। ସମସ୍ତ ମୃତକ ଶିଭମୋଗା ଅଞ୍ଚଳର ବୋଲି ଜଣା ପଡ଼ିଛି।ସୂଚନା ଅନୁସାରେ, ପୁଣେ-ବାଙ୍ଗାଲୁରୁ ରାଜପଥ ନିକଟ ରାସ୍ତା ପାଖରେ ଏକାଧିକ ଟ୍ରକ୍ ପାର୍କିଂ କରି ଛିଡ଼ା ହୋଇଥିଲେ। ଏହି ସମୟରେ ଏକ ଯାତ୍ରୀବାହୀ ମିନି ବସ୍ ଟ୍ରକକୁ ଧକ୍କା ଦେଇଥିଲେ।
ଏଥିରେ ଘଟଣାସ୍ଥଳରେ ୧୧ ଜଣଙ୍କର ଜୀବନ ଚାଲିଯାଇଛି। ଆହତମାନଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଯାଇ ଥିବାବେଳେ ସେଠାରେ ଚିକିତ୍ସାଧୀନ ଅବସ୍ଥାରେ ୪ ଜଣଙ୍କ ମୃତ୍ୟୁ ଘଟିଛି।ମିନି ବସରେ ୧୭ ଜଣ ତୀର୍ଥଯାତ୍ରା ପାଇଁ ବେଲାଗାଭି ଜିଲ୍ଲାକୁ ଯାଇଥିଲେ। ତୀର୍ଥଯାତ୍ରା ସାରି ଫେରିବା ସମୟରେ ଏହି ଦୁର୍ଘଟଣା ଘଟିଛି। ହାଭେରୀ ଜିଲ୍ଲାର ଗୁଣ୍ଡେନାହାଲି କ୍ରସିଂ ନିକଟରେ ଭୋଅର ପ୍ରାୟ ୩.୪୫ ସମୟରେ ରାସ୍ତାକଡରେ ଛିଡ଼ା ହୋଇଥିବା ଟ୍ରକକୁ ଧକ୍କା ଦେଇଥିଲା ବସ୍। ଦୁର୍ଘଟଣାର କାରଣ ଜଣାପଡି ନ ଥିବାବେଳେ ବସ୍ ଡ୍ରାଇଭର୍ ଢୋଳେଇ ପଡ଼ିବାରୁ ଦୁର୍ଘଟଣା ଘଟିଥିବା ପୁଲିସ ସନ୍ଦେହ କରୁଛି।
